पेसागत हकहितका लागि प्रतिबद्धता

भरतपुर । पेसागत हकहितका लागि एकताबद्ध भएर अघि बढ्ने चितवनका पत्रकारहरुले प्रतिबद्धता गरेका छन् ।
प्रेस चौतारी चितवनले पत्रकार महासंघ चितवनका नवनिर्वाचित कार्यसमिति एवम् पार्सदहरुलाई गरेको बधाई तथा सम्मान कार्यक्रममा वक्ताहरुले यस्तो प्रतिबद्धता जनाएका हुन् ।
कार्यक्रममा महासंघ चितवनका अध्यक्ष हरिप्रसाद पोख्रेलले निर्वाचनमा भएको हार–जितलाई कुनै प्रवाह नगरी सबै पत्रकारहरुलाई एकताबद्ध बनाएर अघि बढ्ने बताउनुभयो । उहाँले श्रमजीवी पत्रकार ऐनको कार्यान्वयन, पेसागत सुरक्षा र क्षमता विकासका कार्यक्रममा ध्यान दिइने बताउनुभयो ।
कार्यालय भवनलाई पूर्णता दिन पनि जिल्लाका सबै पत्रकारलाई एकताबद्ध भएर अघि बढ्ने प्रतिबद्धता गर्नुभयो । कार्यक्रममा एमाले चितवनका प्रचार विभाग प्रमुख अरूणपीडित भण्डारीले महासंघलाई पार्टीले आवश्यक सहयोग गर्न तयार रहेको बताउनुभयो ।
कार्यक्रममा पत्रकार महासंघ चितवनका निवर्तमान अध्यक्ष जनक अर्यालले महासंघको केन्द्रीय अधिवेशनमा चितवनले विशेष उपस्थिति र भूमिका खेल्नुपर्ने सुझाव दिनुभयो । पूर्वअध्यक्ष कृष्ण गिरीले तीन वर्षे कार्यकाल योजनाबद्ध रुपमा अघि बढाउन नवनिर्वाचित कार्यसमितिलाई आग्रह गर्नुभयो ।
कार्यक्रममा प्रेस चौतारी नारायणी अञ्चल अध्यक्ष तिलक रिमाल, एमाले जिल्ला कमिटी सदस्य उत्तम अधिकारी, प्रेस युनियन चितवनका अध्यक्ष नारायणप्रसाद अधिकारी, क्रान्तिकारी पत्रकार महासंघका जिल्ला अध्यक्ष नवराज ढकाल, स्वतन्त्र पत्रकार संघका अध्यक्ष सूर्यप्रकाश कँडेल, आदिवासी जनजाति पत्रकार संघ चितवनका अध्यक्ष सन्तकुमार चौधरीलगायतले बोल्नुभएको थियो । चौतारी कार्यसमिति सदस्य राजु भट्टले स्वागत मन्तव्य राख्नुभएको उक्त कार्यक्रममा चौतारीका जिल्ला अध्यक्ष शालिग्राम नेपालको अध्यक्षता रहेको थियो ।